(أنتي وأنا)
ماني وحيد وكلّ ربعي حواليّ
نهبش (سوالف) ونْتقهوى (مَسرّه)
وأنتي وَحيده رشّي أفكارك بميّ
يمكن تطفّيهـــا بعد كلّ حرّه
كنّا .. أنا: أنتي // وأنتي: بن ضحيّ
واليوم حرب مفارقك مستمرّه
لوداعْ يا (شجرة هوانا) إلى الفيّ
شايم مـ دامك تثمرين المضرّه
كنتي يباس // وقلت: يمكن مع الرّي
ينقض (أمل) لو ماي عطفي اغرّه
قمّطتْ (وصلك) طفل و ارخيته الطيّ
والحين شايب ما لقى من يبرّه
لنّي سقيت الليل من جرّتي (ضيّ)
وانتي كسرتيْ بـ ليلنا ألف جرّه
يا ما كويت ثياب سترك بيديّ
يا ما عـَفسْتيْها على حين غرّه
يا ما طرحت (الصّعب) واجبرت رجليّ
تدعس على جبهته كره وفرّه
شوفي أنا (الطائي) بحبي وكل شيّ
وأنتيْ الفقير الّي عطيته وتشرّه
كل ما ازيد بمدتي زادني غيّ
واوضاع غيري للأسف مستقرّه
خلاص مالي فالعشق بفصخ الزيّ
يلّي تفردنا بـ لوله ودرّه
علّقت ماضينا على غافة الحيّ
واحجار غيضي بالخوالي تفرّه
وأنتي كما أنتي .. وآنا بن ضحيّ
والقلب منك اليوم يكفيه شرّه
أبدعت في رسم الوفا ع الرمل حيّ..!!
وألفت رياحه بالمفارق تذرّه
محمد بن مرزوق بن ضحي
